Google+ Followers

الأحد، 9 نوفمبر، 2014

ستة . سبعة. تمانية - untold ...





مسودة بالعامية
مواقف شخصية اختبرتها ليست نقلا عن لسان احد
 - قرار بالاعتراف بعد التعرض لنوع جديد من التحرش بالنسبالى



اول مرة اتعرضت لتحرش بس مكنش فاهمة ان دة تحرش . كنت صغيرة جدا . كنت ف اتوبيس و نايمة جنب امى و صحيت على ايد بتخبط فى 
كان ولد يمكن ف ثانوى بيحاول يلمسنى و عامل فيها برىء بس انا كنت اصغر من انى ادرك ان دة تحرش او انى اعمل اى تصرف نحيته لكن لما كبرت فهمت للاسف
*****************


تانى مرة اتعرضت للتحرش كنت ف اواخر ابتدائى , كنت طويلة نوعا - قبل ما ربنا يوقف نموى- معتقدش ان حجمى كان كبير بالنسبة لسنى لكن قطعا مكنتش من النوع السفيف الذى لا يرى بالعين المجردة
كنت مستنية جدى على اول شارع بيتنا و شوية عيال فاكرة شكلهم كويس جدا على الرغم من مرور سنين على الموضوع كانوا صغيرين يمكن ف اعدادى , حاولوا يخوفونى بحركات عيال لكن فضلت ثابتة ف مكانى مجرد نظرة متقززة منى و رجعت اركز على  الشارع , بعد دقيقة واحدة حسيت بيد بتتمد على و تمسكنى بصيت مفزوعة لقيت نفس العيال بيجروا بعيد و هما بيضحكوا و ف عنيهم نظرة انتصار و تشفى مفهمتهاش و قتها ,, لكن فاكرة كويس جدا انى مسكت نفسى لحد م وصلت بيتنا و اتفتحت فالعياط 
الجزء اللى مسكوه فضل واجعنى اليوم كله مش وجع جسدى , وجع نفسى 
فضلت فترة طويلة خايفة من الشارع و بكره الهدوم اللى كنت لابساها وقتها

*****************
تالت مرة اتعرضت للتحرش كانت ف اولى اعدادى كنت دايما بمشى من فوق الكوبرى و انا رايحة مدرستى عشان  اهرب من نظرات تحرش البياعين اللى تحت الكوبرى , كنت ماشية الصبح لوحدى بلبس المدرسة الواسع جدا وشى فى الارض و بمد وولد ماشى ف وشى, و لانى كنت لسة طفلة مفهمتش ان النظرة اللى على وشه دى نظرة حيوان مش بنى ادم
مد ايده بسرعة مسكنى جامد لدرجة ان ايده بعد كده كانت معلمة على , لما مسكنى كنت اول مرة ف حياتى اعلى صوتى فى الشارع
شتمته شتيمة واحدة " يا حيوان " ضحك و مشى 
فضلت اعدادى كلها بمسك الكتب ف حضنى عشان اخبى نفسى .. كنت على وشك كتفى يقفل على بعضه من كتر ما كنت بضمهم عشان اخبى معالم الانوثة اللى فى 

***************


   بعد المرحلة دى التحرش معظمه كان لفظى و لمسات خاطفة لها مليون حجة من صاحبها انه اتكعبل او ان الدنيا زحمة 
الاسوء ان التحرش كان بيصدر ف بعض الاحيان من اصدقاء من المفترض انهم الامان و الحماية 

*************

بعد مرحلة طويلة من التحرشات اللفظية المتدرجة من يا قمر او اية الحلاوة دى او الجزمة دى لونها حلو وصولا لابداء الرأى بأجزاء من الجسد و انتهائا بالتعبير عن افعال و تمنيات ف مخيلاتهم المريضة و كلكسات و تقليب نور و وقوف بالعربية ف بعض الاحيان 

***************
تعتبر رابع مرة فيها تحرش جسدى واضح كنت فى الامتياز - سنة الامتياز بعد كلية علاج طبيعى - كنت ف مكان المفروض انه مكان راقى و نضيف , كنت رايحة اجيب عشا من مينى ماركت و انا بتكلم مع صديقتى اللى كانت معايا بنى ادم راكب عجلة مد ايده على و جرى بعجلته 
و انا اللى نزل على انى كنت بصرخ و بشتم و برتعش و شوية " رجالة" على كراسى على الرصيف بيهدونى " معلش يا انسة حصل خير " ,, حصل خير ! .. خير ايه اللى حصل ؟ ,, اى نوع من انواع الخيرات حصل 
فضلت اصرخ فيهم و اقول انتوا اصلكوا مش رجالة 
و انتهى الموضوع على كدةو كالعادة جالى فوبيا من الشارع و هدومى و الناس 
و لحد النهاردة بخاف لما بسمع صوت عجلة او موتوسيكل جاى من ورايا 

****************

اخر مرة اتعرضت فيها لتحرش جسدى واضح و اقسى مرة كانت الاسبوع اللى فات
كنت بوصل اختى المحطة و مروحة ,, مفيش مواصلات ,, الشمس حامية ,, نعسانة و هموت و اورح 
رميت نفسى ف اول اتوبيس نقل عام عشان اروح ,, وقفت دقايق و مرة واحدة حسيت بحاجة ناشفة ف اخر ضهرى 
 لفيت عشان اشوف اية دة .. لقيت ولد ف اعدادى و الموقف كله باين و متوتر و بيحاول يفلت ف اى حته
انا اتسمرت ف مكانى ربنا انقذنى ان واحد سابلى مكانه فضلت طول الطريق مذبهلة و مبلمة ف الشباك و مش فاهمة انا اية اللى حصلى

اخيرا
 على مر السنين اتربى جوايا غل و كره تجاه الذكور و رغبة غير طبيعية فالايذاء و بعض الاحيان القتل   
اخدت كورس دفاع عن النفس املا ف انى اتمكن من ايذاء " راجل " متحرش لكن مجاليش الجرأة اعمل كدة
 التحرش اجبرنى على الوصول من بنى ادم شيك ف لبسه لبنى ادم بيلبس اعفن لبس و مقاس اكبر من مقاسه و للعلم الموضوع مفرقش   خالص ف معدل التحرش
شفت ب عينى تحرش لطفلة - تحرش لمحجبة - تحرش لمنتقبة - تحرش لست عجوزة جدا - تحرش لبنت بشعرها-
 تحرش من اطفال و عواجيز,, من فقرا فى الاتوبيسات و من اغنيا اللى بيقف بعربيته لاى بنت فى الشارع ف اى وقت من اليوم و يقلب نور و يدى كلكسات و يفضل ماشى و راها   
اجبن متحرش اللى بيهيص فى الزحمة و المواصلات ,
قمة الرخامة انى اكون جنب راجل ف مواصلة و يكون فاتح رجليه على اخرهم و فارد ايده و مريح و انا شوية و هنط على الشباك من كتر م بحاول ابعد و البعيد جبله
بحب اوى " الرجالة " اللى دورها فى المواقف دى كلمة حصل خير ,, النهاردة ست عجوزة صرخت لان واحد لمسها فالاتوبيس ردود الفعل كالتالى صمت رهيب و كل " الرجالة " قلبوا هندى و بيتفرجوا عليها و " راجل" واحد قال جملتين كتر خيره " حصل خير , كويس انها جت على اد كدة " .. مرة تانية كتر خيرك
كلامى لا بيقدم و لا بيأخر و مالوش اى لازمة انا فالمواقف دى جبانة بحط راسى فى الارض و بسكت لان المتحرش بيتطور من متحرش بيسكت لما بيتشتم لمتحرش بيشتم و بيضرب لما بيتشتم و الناس بتتفرج انا مجرد بحكى مواقف لان دا اخرى  
اخر ملحوظة انا من الحالات اللى بتتعرض للتحرش بنسب قليلة و مفيش موقف شديد خرج عن السيطرة نشكر ربنا تخيل كدة ان  بعد كل دة انا من الحالات الخفيفة و ان فيه بيتعرضوا للاسوء


 دا جزء من حملة رسامة اسمها تاتيانا عن التحرش عبارة عن بوسترات مرسومة ومحطوطة على جدران الشوارع 












 i was not built to break .. i didn't know my own strength 




السبت، 16 أغسطس، 2014

escaping plans





i wanna escape ..
الهروب هو الحل الامثل
مش هروب كئيب
هروب جامح
الم كل ما املك ف شنطة ضهر
و اختفى

الأحد، 13 يوليو، 2014

And i'll be cursed forever





دعنى أتقدم بصلاتى 
لا لأكون بمنجى من الأخطار
و لكن لأقابلها وجهاً لوجه دون وجل
لا لأسأل التفريغ عن المى، لكن ليكون لى الجَلَد على تحملها
لا لأتوسّل فى رعبِ شديد بغية النجاة
ولكن لأتعلل بالصبر حتى أظفر بحريتى
 هىّء لى يا رب، أللا اكون جباناً لا أستشعر بنعمتك إلا حين أصيب النجاح
.بل دعنى أظفر بضّمة يدك فى خذلانى 
طاغور




اتبنى مؤخرا سياسة تقديم التنازلات
لا لدماثتى ولا كرم اخلاقى 
لكن لايمانى انها اقصر الطرق لاراحة البال
لم اعد اؤمن بالحب 
فالمحبين هم اتعس المخلوقات و ابكرها موتا
المحبين على مدى التاريخ هم المنتحرين و المغرر بهم
هم ابطال ملاحم مأساوية
المحبين يختطفهم الرب على اجنحة السحاب
لا اؤمن بالتضحيات الغير مشروطة
 الجنس البشرى جشع و همجى
لا يقدم التضحيات 
لا شىء سوى سادية مفرطة 
مع لمسة سكوباتية 
و تشوهات نفسية 
حولت معظمنا لمسوخ
و تقديمى الغير محدود للتنازلات 
بغرض تجنب المواجهات احدى تلك التشوهات
تتيح للاخرين استغلال تلك الثغرة لاقصى قدر من الاستفادة
فتولد فىّ مزيد من التشوهات المؤلمة 
لمزيد من الانسحاب
لمزيد من الانغلاق 
اتجاها لاختلال نفسى كامل 


الأربعاء، 11 يونيو، 2014

وسواس مش قهرى





اتكأت على فراشى محتضنة " جردل الزبادى 500 ملل " لا انفك عن التهامه بشراهة

و ينبعث بجوارى صوت سيد درويش من الردايو و هو يردد " انا هويته و انتهيت "
فابتسم بفم ملىء ببقايا " الزبادى " و انظر لوجهى فى المرأة المقابلة لارى علامات البلاهة بادية عليه بشعرى الاشعث  و شكلى " المدهول "
 فانفجر ضاحكة ,,, و التهم اخر ملعقة فى العلبة بنهم .


كرد فعل للتقوقع لفترات طويلة بالمنزل اقضى فترة لا بأس بها مبحلقة فى انعكاسى بمرآة غرفتى  بتحد ,,  اضيق عيناى فى محاولة لاستشفاف حقيقة شخصيتى المخبولة , اتشاجر معى , ارغى و ازبد , اهمهم بكلام غير مفهوم ثم ينتهى شجارى بسبة بذيئة و اغادر المرآة حانقة .

                                         

يوما بعد يوم يزداد يقينى بوجود حيوات اخرى ربما بكوكب اخر او مجرة اخرى 
اشخاص يراقبوننا من على بعد او حتى لا يدركون وجودنا 
حيوات اخرى,ابعاد اخرى ..
ان تكون انت نفسك نتيجة تناسخ ارواح
لا اعلم ربما كنت قط هائم فى خلفية مشهد فى رواية تدور احداثها فى شوارع لندن الفقيرة فى احدى روايات تشارلز ديكينز
او  ممرض نشيط فى معسكرات الحرب 
او جندى بائس على خط النار 
قد يكون عالمنا مجرد ذرة مستقرة على احدى التلال فى عالم مختلف  
على غرار" horton hears a who "
قد نكون اشياء كثيرة لا ندركها بعقولنا المحدودة 
و من ادرك هذه الحقائق وجب فناؤه  ..

انا على شفا الجنون ..





الأحد، 8 يونيو، 2014

كلمات عنيفة مليئة بالكراهية ..




لسة شايفة فيديو الانتهاك للبنت فى التحرير 
قديم او جديد دا ميلغيش انكوا كائنات زبالة عايزة الحرق 
انا بكرهكوا جدا انتوا و كل العالم المعفنة من نوعية تستاهل و تدخل الموضوع  فى السياسة 
يارب تتشل و انت بتكتب الكلمتين دول على الفيس و لا تويتر و انت فخور انك كدا محترم
يا رب تحس احساسها المنيل اللى هى فيه 
يارب تموتوا موتة بطيئة مؤلمة 
و تفضلوا تتعذبوا لوقت طويل
ماهو اصل لو اخوانا الملحدين طلعوا كلامهم صح و ان الكون دا ماشى عشوائى كدة 
انا اروح افرغ مسدس 9 ملل ف نافوخى ارتاح
اللى بيخلينى كل يوم الصبح ابدأ يوم جديد فى العالم المعفن دا انى مؤمنة بالكارما 
انهاردة ليك بكرا على دماغك و دماغ اللى خلفوك 
يارب تولعوا دى البنت اتبهدلت !!
انا مش قادرة استوعب كم التوحش و الشراسة دى 
مش عارفة اترجم تفكير بنى ادم من دول
مخى هنج لما حطيت نفسى مكانه لوهلة 
انا مش عايزة اخلف عيال و اعيشهم هنا 
مش عايزة اطلعهم مشوهين كدا
مسوخ
انا بقيت بخاف امشى فى الشارع يالى متسوش مليم 
بمشى اتلفت حواليا  
انتوا معجونين بأية 
ربنا ياخدكوا يا بعدا
ربنا ياخدكو
تروحوا لابليس يغتصبكوا هناك 

 فاكرة انى شفت لوحة بتمثل اليوم الاخير لرسام مش فاكرة اسمه لكن فاكرة انه كان مصور الخطاه متعلقين كل واحد من العضو اللى بيمثل خطيته سواء اللسان او اليد او الشعر 
 متصوره شكل الناس دى و هما ف لوحة الرسام

الاثنين، 28 أبريل، 2014

هلاوس مسائية



- واحدة اعرفها انتحرت
- خليكوا عايشين ف تيمة الاله
- انت انسان مازوخى ديماجوجى كسول كدب الكوالا
- مش بتحسى بالذنب ابدا ؟؟!
- انا عايزة اموت صغيرة
-انت مش بتتكلمى عن ربنا كتير لية ؟
- حاولت اقربله معرفتش
- حاولى تانى
- كينيا
- طب ممكن ماموتش بس افضل صغيرة طول العمر
- هتتجوزى امتى ؟
- عندى صداع
- هتعيشى فين ؟
- مناخيرى مسدودة 
- خدوا المرتب و سيبولى اجرة التاكسى
- ان وجدتن حبيبى اخبرنه انى مريضة حبا
- صليلى .. هىء حاضر اول ما اصلى
- بحاول ابقى عميقة
- طب ينفع غامضة ؟
- نفسك ف اية ؟
- مبسوطة بصداقتك الجديدة
- ما ايليا اتخطف
- انا مش عايزة اتخطف
- طب ممكن امثل انى ذكية
- نفسى ابقى مبسوطة
- هاه
- ؟؟!!!!
- فوبيا الشارع
- مخنوفة
- من اية ؟
- مش عارفة
- انا بؤمن بالايلينز
- شعرك حلو كدة ؟
-  مبثقش ف حد
- مممم
- هو انا كدة ابقى خاينة ؟
- انا لسة فاكرة
- هى التعابين بتعض يا رامز ؟
- انتى بتستهبلى
- 6:15 الصبح
- ريحته
- it's us against the world - coldplay
-  عمرى ما نسيت
-   هاطلع اتف عليه و نازلة علطول
- مفتقدة حاجات كتير
- دايما بحلم بتعابين
- مفيش اصلا ابراص هنا
- 60 كيلو
- هى البطاريق ممكن تقبل تعيش معايا ؟
- يعنى اية اتخطف ؟ 
- م يا عايش يا ميت
- k's choice - killing dragons
- هتروح النار عشان انتحرت
- اية تخيلك عن ربنا ؟
- اننى اتحداااااك
- و لما قال هذا ارتفع و هم ينظرون و اخذته سحابة عن اعينهم
- احية 
- و هل ترى منحتنى الوجود كى تسلبنى الوجود ؟!
- يا قاتلى انى صفحت عنك 

الثلاثاء، 1 أبريل، 2014

لحظات







 ممتع هو التعلق فى الفراغ رأسا على عقب و شعرك متدلى يتمايل مع نسمات الهواء بلا هدف شاعرا باندفاع الدماء لعروق جبهتك 
التى باتت تنبض بجنون متأرجحا بشدة علك تفلت من ارجوحتك فتطير عاليا قبل ان تعود لجاذبية تنبش اظافرها فيك


 المضى فى الطريق قافزا قفزات صغيرة مرحة بحذاء ملون بألوان فسفورية مبهجة و قميص زهرى منقوش و حقيبة ظهر لا تختلف الوانها عما ترتديه من الوان تتقافز فرحا مع خطواتك الراقصة تقابل النظرات الوقحة بابتسامة ودود غير مبالى بهمساتهم 


لحظات تغيب فيها عن الواقع و تقف خاشعا امام اثر باق من زمن سحيق يسرق فيها انفاسك تلمس كل حجر منه بانبهار 
لتمتزج به و تمتص ذكرياته فتعيش حيوات اخرى متقمصا ادوار من سكنوه قبلا محاولا اختراق حاجز الزمان 

الاثنين، 27 يناير، 2014

Revolution Lake





لقد اصبحت الحياه اكثر نشاطا ...
نقضى ليلتنا راقصين على انغام رصاصات سجانينا .. و ننام عند الفجر منهكين و غدا صراع جديد
نتأمل وجوه بعضنا المنهكة و نبتسم  علنا نرى بارقة امل 
وشمت اجسادنا بندوب جروح قدام مر عليها سنة و اكثر ..
 نتأمل النيران التى اشعلناها فى وسط الميدان بعيون جذله
بعضنا يراها بعين واحدة فالاخرى تغطيها غمامة سوداء نبتت منها زهور يانعه
يداعب النوم اجفاننا المتراخية و يغريها بالانغلاق فنستسلم لحلم لذيذ نرى انفسنا فيه خالدين 
تحيط رؤسنا هالات لامعة كالتى تحيط برؤس القديسين ..
تمر ساعات فنهب مذعورين لاعنين تراخينا لنكمل احاديثنا عن اصدقاء صاروا ذكريات ,
غط بعضنا فى نوم عميق على هدهدة صوت ام كلثوم المنبعث من مذياع قديم احضره احدهم لتمضية الوقت
ناموا امنين وسط اشخاص عرفوهم بالامس ..
نفحات باردة محملة برائحة من سبقونا و تحرروا من قيود الجسد 
تغزوا وجوهنا فنسرق منها انفاس طويلة 
و نكتمها داخل صدورنا 
و نعود فنطلق تلك الانفاس ب آنة حزن يصارعها الامل,,
و ننظر الافق وننتظر الفرج لعله يأتى بعد حين  .


ALL MEN'S SOULS ARE IMMORTAL , 
BUT THE SOULS OF RIGHTEOUS
 .ARE IMMORTAL AND DIVINE 
         SOCRATES   

الخميس، 23 يناير، 2014

انا وحيدة كالحنكليس






بكتب لمجرد الكتابة
بكتب وحدة
بكتب ملل
بكتب كبت
بكتب فتور
بكتب كره للحياة
بكتب هستيريا
بكتب كره لذاتى
بكتب حنق و غضب
بكتب فراغ لا منتاهى
بكتب نقص
بكتب صراخ
لولا الكتابة كنت انتحرت
كنت علقت نفسى ف لمبة الاوضة البهتانة
و رجلى تتمرجح فى الفراغ و عينى مجرد كرة ازاز بتلمع
مبحلقة ف مدى بعيد
بيقولوا المنتحر بيكتب رسالة لاحبائه قبل ما ينهى حياته
لو كتبت هكتبلهم اية !!
احبائى انا انتحرت عشان اخلص منكم !!
انتحرت عشان انتوا شاركتوا مشكورين فى تحويل حياتى لحجيم ف قررت اروح جحيم الطف منكوا شوية
اكتبلكوا اية !!
دورت كتير جدا على دكتور نفسانى
اكون متحمسة و انه هو اللى هيصلحنى و يرجعنى بنى ادم طبيعى
بس ارجع افتكر انه مش ف ايده عصاية سحرية يصلحنى بيها
و ان ممكن هو نفسه يكون مكسور
" اعمى يقود اعمى فيقع الاثنان فى حفرة "
تقريبا محاطةبكل انواع العلاقات الاجتماعية
خطيب - اصدقاء - اب - ام - اخوات
لكن وحيدة كالحنكليس
مبحبش اللطم و الصويت و انى مفيش حد فاهمنى و انى انسان فريد من نوعه
انا كائن غبى متخلف لا محصلة الناس النبيهة اللى فاهمة التيته
و لا التافهين اللى عايشين ف مية المخلل
لا عندى موهبة و لا معدومة المواهب
بحاول اقلد الموهوبين و بحتقر التافهين
و انا اكبر تافهة
ممكن لو كنت انسان طبيعى كنت هعيش عيشة احسن من دى
الفكرة انى بتنازل فى المعاملات الاجتماعية عشان اكسب رضى الناس
و النتيجة" بنفخ ف قربة مقطوعة "
الانسان كائن خراوى بطبعه لما بيتمكن بيركب
عشان كدة الاشتراكية شىء فاشل
احنا البشر عايزين نتعدم ف ميدان مجرى عام
و كل الكائنات الفضائية تتفرج علينا عشان تتعلم
احنا خليقة فسدت و محتاجة فيضان
دنيا مسعود حاطة على ضهرها " خصومة قلبى مع الله "
معرفش لية الكلمة دى شدتنى
انا عارفة انه الوحيد المرحب انه يسمعنى و عمره ما هينتقدنى
لكن فيه مشاكل بينى و بينه فى الوقت الحالى
انا عارفة انه زعلان
و انا جتتى مش خالصة و مش قادرة اصالحه
 بيتهيألى انه فاهم ولا اية ؟!
انا مش هقرا اللى كتبته كتبت و خلاص
" يا عم صلى اهو كلهم بيهزوا "